२०८१ असार ११ सोमबार

प्रदेश २ को नाम र राजधानीको विषयमा दलहरूबीच सघन छलफल

  • admin २०७८ पौष १९ सोमबार

जनकपुरधाम, १९ पुस

प्रदेश २ को नाम र राजधानीको टुंगो लगाउन बसेको विशेष समितिले छलफललाई तीव्रता दिएको छ । प्रदेश सभामुख सरोजकुमार यादवको संयोजकत्वमा गठन गरिएको उक्त समितिले काम थालेको १५ दिन भित्र प्रदेशको नामाकरण र राजधानी विषयमा सघन छलफल प्रतिवेदन प्रदेश सभामा पेस गर्न समय दिएको छ ।

सीमित समय तोकिएकाले समितिको नियमित बैठक बस्ने गरेको सभामुख यादवले बताए । समितिको कार्यविधि पास भइसकेको भन्दै सभामुख यादवले दलहरूले प्रदेशको नाम र राजाधानी प्रस्तावमा सकरात्मक छलफल भइरहेको उनले बताए ।

जनता समाजवादी पार्टी, लोकतान्त्रिक समाजवादी पार्टी र माओवादी केन्द्रले प्रदेश २ को नाम मधेस प्रस्ताव गरेको छ भने एमाले र नेकपा एसले जानकी, कांग्रेसले मिथिला–भोजपुरा नाम प्रस्ताव गरेका छन् । पर्सा केन्द्रित सबै पार्टीका सांसदहरूले मध्य मधेस नाम राख्नुपर्ने भन्दै छुट्टै प्रस्ताव दर्ता गराएका छन् ।

समितिमा दलहरूले गरेको प्रस्तावका साथै स्वतन्त्र रूपमा सासदहरूले गरेको प्रस्तावमा पनि छलफल भइरहेको सभामुख यादवले बताए ।

हुन त, प्रदेश सभाको ८औँ अधिवेशनको पहिलो बैठकलाई सम्बोधन गर्दै मुख्यमन्त्री लालबाबु राउतले जारी अधिवेशनबाट प्रदेशको नाम र राजधानी टुंगो लगाउन सरकार गम्भीर रहेको बताएका थिए ।

त्यसैगरी, सरकारका सहयोगी दल नेकपा एकीकृत समाजवादी पार्टीका संसदीय दलका नेता तथा उद्योग पर्यटन तथा वन मन्त्री सत्रुधन महतोले सत्ता रुढ दलहरूकै प्रदेशको नाम र राजधानीको प्रस्ताव फरक फरक भए पनि साझा प्रस्तावको विषयमा सत्तारुढ दलहरूबीच छलफल भइरहेको बताए ।

‘प्रदेशको नाम र राजधानी टुंग्याउन ढिलो भइसकेको छ,’ मन्त्री महतोले भने, ‘अब ढिलो हुँदैन, ८औँ अधिवेशनबाट जसरी पनि टुंगो लगाउने हाम्रो प्रयास छ ।’
जानकी मधेश, मिथिला मधेश, मध्य मधेश लगायतमा साझा एजेण्डा हुन सक्ने उनले बताए ।

सत्तारुढ दल काग्रेसका प्रमुख सचेतक उपेन्द्र कुश्वाहाले प्रदेशको नाम र राजधानीको विषयमा आफ्नो पार्टी हदैसम्मको लचकता अपनाउने बताए । उनले भने, ‘आठमा मात्र होइन २२ जिल्लालाई मधेश भन्छन् । तर, त्यसकारण साघुँरो बनाउने काम उपयुक्त होइन । यो कुरा मधेशवादी दलहरूले पनि बुझनु आवश्यक छ ।’

प्रदेश सभामा जसपा ३९, कांग्रेस १९, लोसपा १६, एमाले आठ, माओवादी केन्द्र आठ, नेकपा एमाले १३ र रिजवान अन्सारी नेतृत्वको नेपाल संघीय समाजवादी पार्टीको एक सिट छ ।