फिल्म ‘खजुरे ब्रो’मा देखिँदै हर्क साम्पाङ

काठमाडौं, १४ माघ । चलचित्र ‘खजुरे ब्रो’ मा धरान उपमहानगका मेयर हर्क साम्पाङले अतिथि कलाकारको भूमिकाको काम गर्नुभएको छ ।

चलचित्रमा मेयर साम्पाङको विशेष भूमिका रहेको छ । साम्पाङको चरित्रको छायांकन सकिएको चलचित्र निर्माण युनिटले जानकारी दिएको छ ।
‘धरानको आइकनिक व्यक्तिको विषयलाई लिएर यहाँको सांस्कृतिक पक्ष उजागर गर्ने उद्देश्य रहेकाले नगर प्रमुखको अवश्य नै भूमिका रहन्छ,’ कार्यकारी निर्माता डायमण्ड उप्रेतीले भन्नुभयो, ‘चलचित्रमा उहाँको विशेष भूमिका हुनेछ ।’

चलचित्र ‘खजुरे ब्रो’ पारिवारिक व्यङ्ग्यात्मक लाइट कमेडी जनरामा आधारित व्यावसायिक चलचित्र हो । चलचित्रले धरानको संस्कृतिको प्रवर्धन गर्ने र ठूलो पर्दामा स्थानीय कला र रहनसहन झल्काउने निर्माण पक्षको भनाइ छ ।

दिव्यदृश्य इन्टरटेन्टमेन्टको ब्यानरमा निर्देशक सुरज सुनुवारको निर्देशनमा बनिरहेको चलचित्र ‘खजुरे ब्रो’ को निर्माण नवीन मानन्धर र सुरज सुनुवारले गर्नुभएको हो ।