काठमाडौं :निवर्तमान ऊर्जामन्त्री दीपक खड्काले गृहमन्त्री ओमप्रकाश अर्यालमाथि जनतालाई भ्रममा पार्ने काम गरेको आरोप लगाएका छन्। गृहमन्त्री अर्यालले ठूला नेताहरूको सम्पत्ति छानबिन सुरु भएपछि खड्का देश छोडेर भागेको अभिव्यक्ति दिएपछि खड्काले सोमबार निवासबाटै पत्रकारसँग कुरा गर्दै प्रतिक्रिया दिएका हुन्।
खड्काले आफू भागेको भन्ने कुरा असत्य भएको स्पष्ट गर्दै भने, “सरकारले मेरो वारेन्ट काटेको छ र? बाहिर जान रोक लगाएको छ र? यस्तो द्विविधा किन सिर्जना गरिएको?” उनले अमेरिकातर्फ वा सिंगापुर गएको भन्ने हल्ला पनि असत्य भएको बताए।
उनका अनुसार आफू र बच्चा दुवै डेंगुबाट ग्रसित भई ११ दिन भारतको वेदान्त अस्पतालमा उपचार गरेर फर्किएका हुन्। “डेंगुका कारण भारतमा उपचारमा थिएँ, त्यसको सबै रेकर्ड मेरोसँग छ,” उनले भने।
पूर्वमन्त्री खड्काले सरकारलाई छानबिन गर्ने अधिकार रहेको स्वीकार गर्दै भने, “छानबिन होस्, मलाई कुनै आपत्ति छैन। तर म भागेको होइन।” उनले जेनजी पुस्ताको आन्दोलन जायज भए पनि अदृश्य शक्तिहरूको संलग्नताले देशको अस्तित्व नै जोखिममा पर्ने अवस्था सिर्जना भएको बताए।
पत्रकारप्रति इंगित गर्दै खड्काले अध्ययन र यथार्थमा आधारित समाचार लेख्न आग्रह गरे। उनले आफूले कुनै गल्ती नगरेको भन्दै, “सरकारले गल्ती गरेको प्रमाणित नगरेसम्म म जुन देशमा पनि जान सक्छु,” भने।
तपाइँको प्रतिक्रीया