अस्ट्रेलिया — अस्ट्रेलियाली प्रधानमन्त्री एन्थोनी अल्बानीजिले सिड्नीको बोन्डी बीचमा गत डिसेम्बर १४ मा भएको आतंकवादी आक्रमणमा परी ज्यान गुमाएका पीडितहरूको परिवारप्रति क्षमायाचन व्यक्त गरेका छन्। प्रधानमन्त्रीले भने, “म गहिरो रूपमा दुःखी छु कि हामीले तपाईंका प्रियजनलाई यस दुष्ट घटनाबाट सुरक्षा दिन सकेनौँ।”
सिड्नी ओपेरा हाउसमा आयोजित स्मरण सभामा राज्य तथा संघीय नेताहरू, गभर्नर–जनरल स्याम मोस्टिन, दूतावास प्रतिनिधि, समुदायका नेता र उद्धारकर्मीहरू उपस्थिति रहेको थियो। प्रत्येक मृतकको परिवारको प्रतिनिधिले मैनबत्ती बालेर श्रद्धाञ्जली अर्पण गरे।
सभामा सहभागीहरूले एक मिनेट मौनता राखे र आतंकवादविरुद्ध एकता, सहिष्णुता र राष्ट्रिय सद्भावको सन्देश दिएका थिए। NSW का प्रिमियर क्रिस मिन्सले यहूदी समुदायलाई ओपेरा हाउस पुनः शान्ति र एकताको प्रतीक बनाएकोमा प्रशंसा गर्दै भने, “आज हामी हाम्रो सबैभन्दा महत्वपूर्ण भवनमा अस्ट्रेलियाको उत्तम पक्ष प्रकट गर्न भेला भएका छौँ।”
प्रधानमन्त्री अल्बानीजिले यहूदी समुदायको एकता र साहसको प्रशंसा गर्दै, भविष्यमा यस्ता हिंसात्मक घटनालाई रोक्न कडा कदमहरू अवलम्बन गर्ने प्रतिबद्धता दोहोर्याए। यो बोन्डी बीच आक्रमण अस्ट्रेलियामा विगतमा भएको सबैभन्दा जघन्य सामूहिक गोलीकाण्डमध्ये एक मानिन्छ र यसले राष्ट्रव्यापी सुरक्षा, समुदायबीचको विश्वास र आपसी आत्मीयताको महत्त्वलाई पुनः प्रश्नचिन्हमा पारिदिएको छ। सरकारले उक्त घटनापछि नयाँ सामाजिक समावेशी र सुरक्षा उपायहरूलाई प्रभावकारी बनाउन व्यापक कानुनी तथा कार्यक्रमगत सुधारहरू अघि बढाउने आश्वासन दिएको छ।
तपाइँको प्रतिक्रीया