पर्थ, पश्चिम अस्ट्रेलिया — पश्चिम अस्ट्रेलियामा बसोबास गर्ने नेपाली समुदायका लागि एक महत्वपूर्ण कूटनीतिक अवसर सृजना भएको छ। गैरआवासीय नेपाली संघ (NRNA) Western Australia (SCC WA) ले Nepali Association of Western Australia (NAWA) Inc. तथा Perth Nepali Mandir & Community Center (Pashupatinath Bouddhanath Western Australia – PBWA) सँगको सहकार्यमा नेपालकी राजदूत महामहिम चित्रलेखा यादवसँग विशेष ‘Meet & Greet’ तथा अन्तरक्रिया कार्यक्रम आयोजना गर्ने घोषणा गरेको छ।
आगामी शनिबार, २१ फेब्रुअरी २०२६ मा दिउँसो ३:०० बजेदेखि ५:०० बजेसम्म Victoria Park स्थित Mo:Mo Planet मा सञ्चालन हुने यस कार्यक्रमले पर्थस्थित नेपालीहरूलाई राजदूतसँग प्रत्यक्ष संवाद गर्ने अवसर प्रदान गर्नेछ। कार्यक्रममा समुदायका प्रतिनिधि, व्यवसायी, विद्यार्थी, युवा तथा परिवारलाई सहभागी हुन खुला आमन्त्रण गरिएको छ।
महामहिम चित्रलेखा यादव हाल अष्ट्रेलियाका लागि नेपालकी राजदूतका रूपमा कार्यरत छिन्। क्यानबेरास्थित नेपाली दूतावासको नेतृत्व सम्हाल्दै आएकी उनले नेपाल–अष्ट्रेलिया सम्बन्ध सुदृढ पार्ने, कन्सुलर सेवा प्रभावकारी बनाउने तथा प्रवासी नेपाली समुदायसँग समन्वय बढाउने कार्यमा सक्रिय भूमिका निर्वाह गर्दै आएकी छन्। पर्थमा हुन लागेको यो भेटघाट कार्यक्रमले विशेषगरी दूतावास सेवा, पासपोर्ट, भिसा, कानुनी परामर्श तथा द्विपक्षीय सहकार्यका सम्भावनाबारे खुला छलफलको वातावरण तयार गर्ने अपेक्षा गरिएको छ।
आयोजक संस्थाहरूका अनुसार कार्यक्रम केवल औपचारिक स्वागतमा सीमित नरही संवादमुखी हुनेछ, जहाँ सहभागीहरूले आफ्ना जिज्ञासा, सुझाव र अनुभवहरू प्रत्यक्ष रूपमा राजदूतसमक्ष राख्न सक्नेछन्। यसले पश्चिम अस्ट्रेलियामा रहेको नेपाली समुदाय र नेपाली दूतावासबीचको सम्बन्धलाई थप सुदृढ बनाउने विश्वास गरिएको छ।
कार्यक्रमसम्बन्धी थप जानकारीका लागि राजेश बुढाथोकी, नवीन भण्डारी तथा बसु सापकोटासँग सम्पर्क गर्न सकिने जनाइएको छ। आयोजकहरूले “समुदायको एकता नै हाम्रो शक्ति” भन्ने भावनासहित महामहिमलाई पश्चिम अस्ट्रेलियामा स्वागत गर्न सबैलाई उपस्थितिका लागि आग्रह गरेका छन्।
यो विशेष अवसरले पर्थका नेपालीहरूलाई कूटनीतिक संवाद, सामुदायिक एकता र भविष्यका सहकार्यका सम्भावनालाई नयाँ उचाइमा पुर्याउने विश्वास गरिएको छ।
तपाइँको प्रतिक्रीया