एडिलेड/ दक्षिण अष्ट्रेलियाको एडिलेडमा नेपाली स्वाद, संस्कृति र आत्मीय आतिथ्यतालाई केन्द्रमा राखेर नयाँ नेपाली रेस्टुरेन्ट “कुटुम्ब लाउन्ज एन्ड बार” औपचारिक रूपमा सञ्चालनमा आएको छ । अनलीस्थित २७ किङ विलियम रोडमा ( 27 King William Road,Unley) सञ्चालनमा आएको उक्त रेस्टुरेन्ट नेपाली समुदायमाझ मात्रै होइन, विदेशमा बसेर पनि नेपालीपनलाई जीवन्त राख्ने एउटा सांस्कृतिक थलोका रूपमा स्थापित हुने अपेक्षा गरिएको छ ।
युवा नेपाली व्यवसायी प्रशान्त प्रसाई को नेतृत्वमा सञ्चालनमा आएको “Kutumba Lounge & Bar” को भव्य उद्घाटन हालै सम्पन्न भएको हो । उद्घाटन कार्यक्रममा नेपाली समुदाय, व्यवसायी, शुभेच्छुक तथा विभिन्न सांस्कृतिक पृष्ठभूमिका व्यक्तिहरूको उल्लेखनीय उपस्थिति रहेको थियो । नेपाली संगीत, पारम्परिक स्वादका परिकार तथा आत्मीय वातावरणले उद्घाटन समारोहलाई विशेष बनाएको सहभागीहरूले बताएका छन् ।
लामो समय अष्ट्रेलियाको राजधानी क्यानबेरा बसोबास गरेका प्रशान्त प्रसाई नेपाली समुदायबीच एक सफल, मेहनती र सिर्जनशील युवा व्यवसायीका रूपमा परिचित थिए । विभिन्न सामाजिक तथा व्यवसायिक गतिविधिमार्फत उनले त्यहाँ नेपाली समुदायसँग नजिकबाट सम्बन्ध बनाएका थिए । क्यानबेरामा रहँदा उनले नेपाली स्वाद, नेपाली आतिथ्यता र समुदायको एकताको महत्वलाई अझ नजिकबाट अनुभूति गरे । त्यही अनुभव, सपना र आत्मविश्वास बोकेर उनले आफ्नो नयाँ यात्रा एडिलेडबाट सुरु गरेका हुन् । नेपाली खानाको मौलिक स्वादसँगै पारिवारिक वातावरण र सांस्कृतिक पहिचानलाई प्रवर्द्धन गर्ने उद्देश्यले “कुटुम्ब” अवधारणा अघि बढाइएको उनले बताएका छन् ।
“कुटुम्ब” शब्द आफैंमा परिवार, आत्मीयता र सम्बन्धको प्रतीक हो । यही भावनालाई केन्द्रमा राखेर स्थापना गरिएको “Kutumba Lounge & Bar” मा नेपाली परिकारको मौलिक स्वादसँगै परिवारजस्तै आत्मीय वातावरण दिने प्रयास गरिएको सञ्चालक पक्षले जनाएको छ । रेस्टुरेन्टमा प्रवेश गर्नेबित्तिकै नेपाली संगीत, नेपालीपन झल्काउने सजावट र आतिथ्यताले विदेशमा रहेका नेपालीलाई आफ्नै घरको अनुभूति दिलाउने उद्देश्य राखिएको छ ।
उद्घाटनपछि सञ्चालक प्रशान्त प्रसाई र उनकी सहयात्री वर्षाले सामाजिक सञ्जालमार्फत सन्देश साझा गर्दै उद्घाटन कार्यक्रममा सहभागी भएर माया, साथ र शुभकामना दिने सबैप्रति आभार व्यक्त गरेका छन् । “संस्कृति, परिवार र नेपाली स्वादप्रतिको प्रेमबाट सुरु भएको सपना आज वास्तविकतामा बदलिएको छ,” उनीहरूले उल्लेख गरेका छन् । उनीहरूको भनाइमा समुदायको विश्वास र साथले नै आफूहरूलाई अझ जिम्मेवार र उत्साहित बनाएको छ ।
एडिलेडमा नेपाली समुदाय निरन्तर विस्तार भइरहेको सन्दर्भमा “कुटुम्ब लाउन्ज एन्ड बार” जस्ता व्यवसायहरूले नेपाली खानाको प्रवर्द्धन मात्र होइन, नेपाली संस्कृति र पहिचानलाई बहुसांस्कृतिक अष्ट्रेलियाली समाजमाझ परिचित गराउने महत्वपूर्ण भूमिका खेलिरहेका छन् । विशेषगरी विदेशमा हुर्किरहेका नयाँ पुस्तालाई नेपाली स्वाद, भाषा र संस्कृतिसँग जोड्ने माध्यमका रूपमा पनि यस्ता स्थानलाई हेरिएको छ ।
युवा उमेरमै संघर्ष, निरन्तर मेहनत र समुदायप्रतिको विश्वासलाई साथ लिएर क्यानबेराबाट एडिलेडसम्मको यात्रा तय गरेका प्रशान्त प्रसाईको यो नयाँ प्रयास धेरै नेपाली युवाका लागि प्रेरणाको कथा बनेको छ । “कुटुम्ब” अब केवल एउटा रेस्टुरेन्ट होइन, विदेशमा बसेर पनि नेपाली आत्मीयतालाई जीवित राख्ने साझा भावना र भेटघाटको नयाँ थलो बनेको समुदायको विश्वास छ ।
नेपाली स्वाद र सांस्कृतिक आत्मीयतालाई प्राथमिकता दिँदै सञ्चालनमा आएको “कुटुम्ब लाउन्ज एन्ड बार” आगामी दिनमा एडिलेडको लोकप्रिय नेपाली गन्तव्य बन्ने अपेक्षा गरिएको छ ।
तपाइँको प्रतिक्रीया