लन्डन ;-लन्डनस्थित युनिभर्सिटी अफ ग्रीनवीचमा सम्पन्न ‘नेपाल एजुकेशन अवार्ड्स युके २०२५’ समारोहमा साउथ वेस्टर्न स्कुलका प्रिन्सिपल डा. रमेश अधिकारी ‘बेस्ट प्रिन्सिपल अवार्ड २०२५’ बाट सम्मानित भएका छन्।
कलेज रिडर्स पत्रिकाद्वारा आयोजित कार्यक्रममा बेलायतका लागि नेपाली राजदूत चन्द्रकुमार घिमिरेको प्रमुख आतिथ्य र विश्वविद्यालयकी उपकुलपति प्रोफेसर जेन ह्यारिङटनको उपस्थितिमा डा. अधिकारीलाई सम्मान गरिएको हो।
निर्णायक मण्डलका प्रमुख प्रा. डा. दीपक बहादुर शाक्यका अनुसार नेपालमा शैक्षिक उन्नयनमा योगदान पुर्याउने व्यक्तित्वहरूलाई अन्तर्राष्ट्रियस्तरमा सम्मानित गर्ने उद्देश्यले डा. अधिकारीलाई यो अवार्ड प्रदान गरिएको हो।राजदूत घिमिरेले कार्यक्रममा नेपाल–बेलायतबीचको शैक्षिक साझेदारी र साझा मूल्यहरूको प्रशंसा गर्दै उत्कृष्टताको कुनै सीमा नहुने बताएका थिए।
डा. रमेश अधिकारी धादिङको त्रिपुरासुन्दरी–३ निवासी एक अनुभवी शिक्षाविद् तथा साउथ वेस्टर्न स्कुलका प्रिन्सिपल हुनुहुन्छ । उहाँले विगत दुई दशकदेखि नेपाली शिक्षा क्षेत्रमा नेतृत्व, गुणस्तरीय शिक्षाको प्रवर्द्धन र नवप्रवर्तनमार्फत उल्लेखनीय योगदान पुर्याउँदै आउनुभएको छ। शैक्षिक सुधारका लागि उहाँले देश–विदेशमा विभिन्न सेमिनार, तालिम र कार्यक्रमहरूमा सक्रिय भूमिका निर्वाह गर्नुभएको छ।
१८९० मा स्थापना भएको युनिभर्सिटी अफ ग्रीनवीच हाल १२५ भन्दा बढी देशका करिब २५,००० विद्यार्थीहरूको अध्ययन केन्द्र बनेको छ।
तपाइँको प्रतिक्रीया