चितवन समाज साउथ अष्ट्रेलियाको दोस्रो अधिवेशन नोभेम्बर २१ मा हुने, सदस्यता नवीकरण म्याद नोभेम्बर १९ सम्म

अष्ट्रेलिया- अस्ट्रेलियाको साउथ अष्ट्रेलियामा बसोबास गर्ने चितवनका दाजुभाइ–दिदीबहिनीहरूको भावनात्मक एकताबाट स्थापित चितवन समाज साउथ अष्ट्रेलिया (CSSA) ले आफ्नो दोस्रो अधिवेशन यही २१ नोभेम्बर २०२५, शुक्रबारका दिन आयोजना गर्न लागेको छ।

समुदायको भेटघाट, विचार–विनिमय र संस्थागत यात्रालाई अझ मजबुत बनाउने अपेक्षासहित अधिवेशन Everest Function Centre, Plympton Park मा दिउँसो ३:०० बजेबाट सुरु हुनेछ। समाजले संस्थालाई स्थिर, सबल र सहभागीमुखी बनाउन वार्षिक सदस्यता दर्ता तथा नवीकरण प्रक्रियालाई नोभेम्बर १९, २०२५ सम्मका लागि थप गरेको छ।

संस्थापक सदस्यदेखि सल्लाहकार र साधारण सदस्यसम्म सबैलाई तोकिएको मितिभित्र सदस्यता दर्ता वा नवीकरण पूरा गर्न विशेष आग्रह गरिएको छ। अनलाइन फारममार्फत सजिलै भर्न सकिने भएकाले यस वर्षको सदस्यता उत्साहपूर्वक पूरा गर्न समाजले समुदायलाई प्रेरित गरेको छ। अस्ट्रेलियाको व्यस्त जीवन, कामको चाप र परिवार चलाउने दैनिकीबीच पनि चितवन समाजले नेपाली आपसी चिनजान, माया, सहयोग र संस्कृतिसँगको सम्बन्धलाई जोगाइराख्ने महत्वपूर्ण भूमिका खेल्दै आएको छ। यही निरन्तरतालाई अझ सुदृढ बनाउन, आगामी योजनाहरूलाई सामुहिक रूपमा अघि बढाउन तथा नयाँ अभिलाषाका साथ समाजलाई अघि ल्याउन सदस्यहरूको सक्रिय उपस्थिति अपरिहार्य हुने समाजले उल्लेख गरेको छ।

अधिवेशनले गत गतिविधिको समीक्षा, भावी योजना तथा समुदायबीचको न्यानो सम्बन्धलाई अझ गहिरो बनाउने अपेक्षा गरिएको छ। सदस्यता प्राप्त गरेपछि अधिवेशनमा सहभागी हुने अधिकार स्वतः सुरक्षित हुने समाजको भनाइ छ। चितवन समाज साउथ अष्ट्रेलियाले सबै चितवनप्रेमीलाई एउटै छातामुनि ल्याउँदै, “साझा माटो, साझा पहिचान”—यही भावना बोकेर दोस्रो अधिवेशनमा सहभागी हुन हार्दिक निमन्त्रणा गरेको छ।