भावनात्मक प्रेम गीतका बादशाह यम बरालको रोमान्टिक धुनसँगै ‘रमझम साँझ २०२५’ एडिलेडमा हुँदै

एडिलेड,अष्ट्रेलिया / नेपाली आधुनिक संगीतका प्रतिष्ठित गायक यम बराल एडिलेडमा हुन लागेको रमझम साँझ २०२५ मार्फत आफ्ना श्रोता–दर्शकहरूसामु आउने भएका छन्। दशकमै मन छोएका प्रेमभावयुक्त गीतहरूका कारण ‘भावनात्मक प्रेम गीतका बादशाह’ उपाधिले सम्मानित बराल अहिले पनि नेपाली संगीतप्रेमीको मनमा उत्तिकै स्थापित छन्।

उनका ‘निष्ठुरीले छाडेर गइहाली…’, ‘तिम्रो यादले…’, ‘तिम्रो मायाले मार्यो मलाई…’, ‘सजिलै बिर्सिने…’ जस्ता कालजयी गीतहरूले उनलाई आधुनिक संगीतको आत्मीय र संवेदनशील स्वररूपमा चिनाएका छन्। मिठासपूर्ण धुन, जीवन्त अभिव्यक्ति र गीतमार्फत भावनालाई सिधै श्रोताको मनमा पुर्‍याउन सक्ने क्षमताले बराललाई देश–विदेशमा अत्यन्त लोकप्रिय बनाएको छ।

यसै सांगीतिक यात्रालाई अझ नजिकबाट अनुभव गराउने उद्देश्यले थ्री केजी इभेन्ट्सले आयोजना गर्न लागेको रमझम साँझ २०२५ आगामी १४ डिसेम्बरमा एभरेस्ट रेस्टुरेन्ट & इभेन्ट सेन्टर, प्लिम्पटन पार्कमा भव्य रूपमा सम्पन्न हुने भएको छ। साँझ ५ बजेबाट सुरु हुने यो विशेष कार्यक्रममा यम बरालले आफ्ना सदाबहार गीतमार्फत दर्शकलाई पुराना स्मृतिहरूदेखि नयाँ तरंगसम्म डुबाउने साङ्गीतिक माहोल बन्ने आयोजक थ्री केजी इभेन्टका निर्देशक खुम घलेले बताउनुभयो । निर्देशक घलेले यो पारिवारिक साङ्गीतिक कार्यक्रम भएकाले आफ्नो परिवारसहित टेबल बुकिङ गर्न गीत संगीतलाई माया गर्नुहुने एडिलेडबासी नेपालीहरूमा अनुरोध समेत गर्नुभएको छ। घलेका अनुसार बरालको साङ्गीतिक कार्यक्रम अस्ट्रेलियाका अन्य स्टेटहरुमा पनि रहेको बताउनुभयो।

कार्यक्रमको संचालन शभा डीसी र प्रेरणा ढुँगानाले संयुक्त रूपमा गर्नेछन्। रमझम साँझ २०२५ एडिलेडमा बसोबास गर्ने नेपाली समुदायका लागि संगीत, भावना र स्मृतिले भरिएको अविस्मरणीय अनुभव बन्ने अपेक्षा गरिएको छ। कार्यक्रमबारे थप जानकारीका लागि आयोजकले उपलब्ध गराएको यो नम्बरमा 0431 062 520 सम्पर्क गर्न सक्नुहुनेछ।