महिला क्रिकेट प्रवर्द्धनमा एन्काको पहल: फ्रेन्डसिप कप नोभेम्बर २९ मा

एडिलेड । नेपाली महिला क्रिकेटको विकास र बहुसांस्कृतिक समुदायबीचको खेलमैत्री सम्बन्धलाई सुदृढ बनाउने लक्ष्यसहित नेप्लिज क्रिकेट एशोसिएसन (एन्का) ले यस वर्ष पनि बहुप्रतिक्षित एलसिए–एन्का फ्रेन्डसिप कप आयोजना गर्ने भएको छ। यही नोभेम्बर २९, शनिबार साउथ अष्ट्रेलियाका चार प्रमुख समुदाय—नेपाली, भारतीय, पाकिस्तानी र श्रीलंकाली महिला क्रिकेट टिमहरूले मैत्रीपूर्ण प्रतियोगितामा प्रतिस्पर्धा गर्ने एन्का अध्यक्ष विजय जोशीले बताएका छन्।

जोशीका अनुसार, फ्रेन्डसिप कपको मुख्य उद्देश्य प्रिमियर क्रिकेटका लागि उदीयमान र प्रतिभाशाली महिला क्रिकेटरहरूलाई पहिचान र उत्प्रेरणा दिनु, तथा क्रिकेटको माध्यमबाट बहुसांस्कृतिक समाजलाई एकसाथ जोड्नु हो। उनका शब्दमा, “यो प्रतियोगिता महिला क्रिकेटलाई सबैका लागि सहज, समावेशी र अवसरले भरिएको खेलका रूपमा स्थापित गर्ने हाम्रो प्रयासको निरन्तरता हो।” यसअघि साउथ अष्ट्रेलियन क्रिकेट एसोसिएसन (SACA) ले महिला क्रिकेटमा उल्लेखनीय पहल गरे पनि विभिन्न कारणले कार्यक्रम स्थगित भइरहेका बेला, एनकाले दोस्रो वर्ष निरन्तरताका साथ यो प्रतियोगिता अघि बढाउनु समुदायका लागि सकारात्मक कदमका रूपमा हेरिएको छ।

फ्रेन्डसिप कपका विजेता टिमलाई कप र मेडल प्रदान गरिनेछ। साथै, नेपाली समुदायलाई खेलमैदानमा उपस्थित भई खेलाडीहरूको हौसला बढाउन अध्यक्ष जोशीले विशेष अनुरोध गरेका छन्। प्रतियोगिताको मुख्य प्रायोजक LCA (Livability Care Australia) रहेको छ। एन्काको यो पहलले एडिलेडस्थित दक्षिण एशियाली समुदायबीच महिला खेलकुदको सम्भावना र उत्साहलाई अझ उचाइमा पुर्‍याउने विश्वास गरिएको छ।