मेलबर्न,अष्ट्रेलिया/ अष्ट्रेलियाको भिक्टोरियास्थित एनआरएनए (गैरआवासीय नेपाली संघ) भिक्टोरियाले समूदायसँग अन्तरक्रिया गर्दै आगामी एक वर्षका कार्यक्रमहरू सार्वजनिक गरेको छ। कार्यक्रममा समूदायका प्रतिनिधि, स्थानीय नेपाली संघ–संस्था तथा विभिन्न पेशागत समूहका प्रतिनिधिहरूको उपस्थिति रहेको थियो।
अन्तरक्रियाका क्रममा सहभागीहरूले अभिभावक पिकनिक, दशैं–तिहारलगायतका चाडबाडमा विभिन्न संस्थासँग सहकार्य गर्दै सञ्चालन हुँदै आएका कार्यक्रमलाई अझ प्रभावकारी बनाउने सुझाव राखे। त्यस्तै, अन्तर्राष्ट्रिय नारी दिवस, बालबालिका तथा युवालाई लक्षित गतिविधि, खेलकुद तथा परिवारमुखी कार्यक्रमहरूलाई अझ व्यापक बनाउनु पर्ने धारणा पनि व्यक्त गरेका थिए।
एनआरएनए भिक्टोरियाका संयोजक महादेव धानुकले समूदायबाट आएको सबै सुझावलाई उच्च प्राथमिकताका साथ समेटिने बताए। उहाँका अनुसार, संस्थाले सुरुदेखि नै समूदायलाई केन्द्रमा राखी कार्यक्रम सञ्चालन गर्दै आएको र आगामी वर्षका गतिविधिहरूलाई अझ समावेशी, उपयोगी र प्रभावकारी बनाउने लक्ष्य रहेको जानकारी गराउनुभएको थियो। धानुकले हालसम्म भिक्टोरियन नेपाली समाजलाई जोड्ने पुलको भूमिकामा संस्था सफल बन्दै आएको उल्लेख गर्दै आगामी दिनमा सहयोग, सहकार्य र समन्वयलाई अझ सुदृढ गरिने बताएका थिए। यस्तै कार्यक्रममा काउन्सिलबाट प्राप्त हुने सुविधाहरुको विषयमा समेत एनआरएनले प्रशिक्षणमूलक कार्यक्रम गर्ने जानकारी दिइएको थियो। समुदायबाट प्राप्त सबै सुझावलाई आगामी कार्ययोजनामा समावेश गरी कार्यक्रमलाई अझ सशक्त रूपमा अघि बढाइनेछ संयोजक धानुकले कार्यक्रममा उपस्थित समुदायका प्रतिनिधि माझ जानकारी गराउनुभएको थियो।
अन्तरक्रियामा एनआरएनए भिक्टोरियाले चाँडै नै विस्तृत वार्षिक कार्ययोजना सार्वजनिक गर्ने र प्रत्येक कार्यक्रमलाई जिम्मेवारीसहित कार्यान्वयन गर्ने प्रतिबद्धता पनि व्यक्त गरिएको थियो।
तपाइँको प्रतिक्रीया