एडिलेड,अष्ट्रेलिया / कनेक्ट एजुकेशन अष्ट्रेलियाको एडिलेड सिटी अफिस शनिबार एक विशेष समारोहका बीच भव्य रूपमा उद्घाटन गरिएको छ। दक्षिण अष्ट्रेलियाका लिबरल नेता केडी सिंहले नयाँ कार्यालयको रिबन काटी औपचारिक रूपमा उद्घाटन गरे। उनले कनेक्ट एजुकेशनले अष्ट्रेलियामा अध्ययन तथा कन्सल्टेसन सेवामा विश्वसनीय छवि बनाउँदै आएको उल्लेख गर्दै नयाँ सिटी अफिसले विद्यार्थी तथा समुदायलाई अझ सहज र गुणस्तरीय सेवा प्रदान गर्ने विश्वास व्यक्त गरे। सिंहले कनेक्टको विस्तारलाई नेपाली समुदायको सक्रियता र सफल यात्राको प्रतीकका रूपमा पनि व्याख्या गरे।
उद्घाटन समारोहमा साउथ अष्ट्रेलिया सरकारको बहुसांस्कृतिक आयोगकी सदस्य मञ्जु खड्का, एडिलेडका नेपाली समुदायका वरिष्ठ अगुवाहरू, व्यवसायी तथा विभिन्न संघ–संस्था प्रतिनिधिहरूको उल्लेखनीय उपस्थिति रहेको थियो। उपस्थित अतिथिहरूले कनेक्ट एजुकेशनले विद्यार्थीलाई मार्गनिर्देशन, काउन्सेलिङ र भिसासम्बन्धी सहयोगमा पुर्याउँदै आएको योगदानको प्रशंसा गर्दै नयाँ सिटी कार्यालयले सेवाको दायरा थप व्यापक बनाउने विश्वास व्यक्त गरे।
समारोहको सभापतित्व कनेक्ट एजुकेशन अष्ट्रेलियाका निर्देशक देवराज कडेलले गरेका थिए। उनले कनेक्टले काठमाडौं र चितवनका शाखा हुँदै एडिलेडमा सुदृढ सेवा विस्तार गरिरहेको बताउँदै अब दक्षिण क्षेत्रपछि मुख्य सिटी क्षेत्रमा पनि सेवा उपलब्ध गराउन पाएको खुशी व्यक्त गरे। कडेलले भने, “विद्यार्थीहरूको आवश्यकताअनुसार नजिकैबाट सेवा पुर्याउने उद्देश्यले हामीले सिटी अफिस स्थापना गरेका हौं। हाम्रो टीमले अझ जिम्मेवार, सहज र प्रभावकारी सेवा प्रदान गर्नेछ।” उनले कार्यक्रममा उपस्थित सबैप्रति धन्यवाद दिँदै कनेक्टको यात्रामा निरन्तर विश्वास र साथका लागि कृतज्ञता व्यक्त गरे।
कार्यक्रमको सञ्चालन विनोद वानियाले आकर्षक ढंगले गरेका थिए। समग्रमा, कनेक्ट एजुकेशन अष्ट्रेलियाको एडिलेड सिटी अफिस उद्घाटन समारोह उत्साहजनक उपस्थिति, प्रेरणादायी शुभकामना र सकारात्मक ऊर्जा बीच सफलतापूर्वक सम्पन्न भएको छ। काठमाडौं र चितवनमा शाखा रहेको कनेक्टले नयाँ कार्यालय सञ्चालनमा आएसँगै एडिलेडका विद्यार्थी तथा समुदायलाई अझ नजिकबाट सेवा प्रदान गर्न थालेको छ।
तपाइँको प्रतिक्रीया